PARCHAIYAAN (PART 2)
SAHIR LUDHYANVI
Tasaw-wooraat ki parchaiyaan ubharti hai
Woh lamhe kitnay dilkush thay,woh ghadiyaan kitni piyari thi
Woh sayhray kitnay naazuk thay,woh ladiyaa-n kitni piyari thi
Busti ki her ek shadaab kali, khwaabo-n ka zajeera thi goyaa
Her mauj-e nafas her mauj-e sabaa, nagmo-n ka zakheeraa thi goya
Nagaah lahektay khayto-n se, taapo ki sadaaye-n aanay lagi
Baarood kay bojhal boo lay ker, pach-chim se hawaa-en aanay lagi
Taameer ke roshan chahray per, takhreeb ka badel phail gaya
Her gaaon may wahshet phail uthi,her shaher may jungel phail gaya
Magrib ke muhaz-zib mulko-n se, kuch khaki vardi posh aaye
Ithlaatay huway magroor aaye, lahraatay huway madhosh aaye
Khamosh zamee-n ke seenay may, khaymo-n ki tanaabay gadhnay lagi
Mukh-khen si mulaayem raaho-n per, booto-n ke khraashay-n padnay lagi
Faujo-n ke bhyaanek band talay, churkho-n ki sadaa-en doob gayi
Jeep-on ki soolagti dhool talay, phoolo-n ki Qabaaye-n doob gayi
Insaan ki Qeemat girnay lagi,ajnaas ke bhao bhi badhnay lagay
Chaupaal ki raunaque ghatnay lagi,bharti ke dafaatir badhnay lagay
Busti ke sajeelay shokh jawaa-n, bun bun ke sipaahi jaanay lagay
Jis raah se kum hi laot sakay,us raah pe raahi jaanay lagay
In jaanay waalay dusto-n may, gairut bhi gayi bernaai bhi
Maao-n ke jawaa-n baytay bhi gaye, bahno-n ke jawaa-n bhai bhi gaye
Busti pe udaasi chanay lagi, maylo-n ki bahaaray-n khatem huwi
Aamo-n ki lachakti shaakho-n se, zhoolo-n ki qataaray-n khatem huwi
Dhool udnay lagi bazaaro-n may,bhookh ugnay lagi khaliyaano may
Her cheez dookaano se uth ker, rooposh huwi teh-khaano may
Bud haal gharo-n ki bud haali, badhtay badhtay janjaal bani
Mehngaai badh ker kaal bani,saari busti kangaal bani
Cherwaahiyaa-n rustaa bhool gayi,penhaariyaa-n penghat chodh gayi
Kitni hi kanwaari ablaa-en, maa baap ki chaukhut chodh gayi
Aflaas zadaa dayhqaano ke, hul bail bikay khaliyaan bikay
Jeenay ki tamanna ke haatho-n, jeenay hi ke sub saamaan bikay
Kuch bhi na raha jub biknay ko,Jismo-n ki tijaarut honay lagi
Khilwat may bhi jo mumnoo-a thi jo,jilwat may jasaarut honay lagi
Tasaw-wooraat ki parchaiyaan ubharti hai